Proverbs 13

1Indodana ehlakaniphileyo iyemukela izeluleko zikayise,
kodwa ihlongandlebe kalilaleli nxa likhuzwa.

2Umuntu uzuza okuhle ngamazwi omlomo wakhe,
kodwa ababi batshisekela udlakela.

3Lowo olinda izindebe zakhe ulinda impilo yakhe,
kodwa lowo osuka abhede nje uyazibulala.

4Ivila liyafisa kodwa lingazuzi lutho,
kodwa izifiso zokhutheleyo ziyagcwaliseka.

5Abalungileyo bayakuzonda okungamanga,
kodwa izigangi ziletha ihlazo lesigcono.

6Ukulunga kuyamlinda umuntu oqotho,
kodwa ububi buyamchitha oyisoni.

7Umuntu angazenza onothileyo, yena engelalutho,
omunye azitshaye umyanga, kanti elenotho enengi.

8Inotho yomuntu ingahlenga impilo yakhe,
kodwa umyanga uvele kasongelwa muntu.

9Isibane sabalungileyo sikhanya sithi kla!
Kodwa isibane sezigangi siyafiphala ngentuthu.

10Ukuziqakisa kukhokhelela engxabanweni,
kodwa ukuhlakanipha kufunyanwa kwabemukela ukwelulekwa.

11Imali ezuzwe ngobuqili iyanyamalala,
kodwa lowo oyizuza ngokuqogelela uyayandisa.

12Ithemba eliphuzayo ligulisa inhliziyo,
kodwa isifiso esigcwalisiweyo siyisihlahla sokuphila.

13Lowo oweyisa izeluleko uzibizela ingozi,
kodwa othobela umlayo uzaphiwa umvuzo.

14Imfundiso yabahlakaniphileyo ingumthombo wokuphila,
iphephisa umuntu emijibileni yokufa.

15Ukuzwisisa okuhle kuletha ukuthandeka,
kodwa indlela yabakhohlisayo inzima.

16Wonke umuntu ohlakaniphileyo wenza konke ngolwazi,
kodwa isiwula sitshengisa ubuthutha baso.

17Isithunywa esibi siwela phakathi kohlupho,
kodwa isithunywa esithembekileyo siletha ukusila.

18Ongananzi ukuqondiswa wehlelwa yibuyanga lehlazo,
kodwa onanza ukukhuzwa uyadunyiswa.

19Simnandi emphefumulweni isifiso singagcwaliseka,
kodwa iziwula kazifuni ukutshiya ububi.

20Ohamba lezihlakaniphi uyahlakanipha,
kodwa othandana leziwula uwela engozini.

21Umnyama ulandelana loyisoni,
kodwa impumelelo ingumvuzo wabalungileyo.

22Umuntu olungileyo utshiyela izizukulwane sakhe ilifa,
kodwa inotho yesoni ibekelwa abalungileyo.

23Insimu yomyanga ingathela ukudla okunengi,
kodwa umona wabalamandla uyayikhukhula.

24Lowo ongasebenzisi uswazi uyayizonda indodana yakhe,
kodwa lowo oyithandayo unqinekela ukuyiqondisa.

25Olungileyo uyadla asuthe ntintinini,
kodwa isisu somubi sihlala silambile.